اسلام آباد: پاک فوج نے اسپن بولدک اور کرم سیکٹر پر افغان طالبان اور فتنہ الخوارج کے حملے ناکام بنا دیے۔
سیکیورٹی ذرائع کے مطابق، افغان طالبان اور فتنہ الخوارج کے دہشت گردوں نے علی الصبح تین مختلف مقامات پر پاک فوج کی چوکیوں پر حملے کیے۔
تاہم، پاک فوج کی بروقت اور مؤثر جوابی کارروائی نے دہشت گردوں کو پسپا ہونے پر مجبور کر دیا۔
موصولہ اطلاعات کے مطابق دہشت گردوں نے دیہاتی علاقوں اور بے گناہ شہریوں کو انسانی ڈھال کے طور پر استعمال کیا۔ جوابی کارروائی میں پندرہ سے بیس دہشت گرد ہلاک کر دیے گئے۔
دہشت گردوں نے پاک افغان دوستی گیٹ کو بھی اپنی جانب سے تباہ کر دیا۔ سیکیورٹی ذرائع نے کہا کہ اس اقدام سے ظاہر ہوتا ہے کہ افغان طالبان نہ تو تجارت کے حامی ہیں اور نہ ہی مقامی آمدورفت کے۔
علاوہ ازیں، گزشتہ رات کرم سیکٹر پر بھی دہشت گردوں کی جانب سے حملے کی کوشش کی گئی تھی، جسے پاک فوج نے مؤثر طور پر ناکام بنا دیا۔
جوابی کارروائی میں افغان طالبان کی آٹھ چوکیاں اور چھ ٹینک تباہ کیے گئے، جن میں ان کے عملے کے افراد بھی مارے گئے۔
کرم سیکٹر میں کئی دہشت گرد مارے گئے اور ان کے پاس موجود امریکی ساختہ اسلحہ بھی قبضے میں لیا گیا۔
پاک فوج کی جانب سے سخت کارروائی کے بعد علاقے میں عارضی طور پر خاموشی ہے، تاہم اطلاعات موصول ہو رہی ہیں کہ اسپن بولدک میں مزید دہشت گرد جمع ہو رہے ہیں۔
