نیویارک (ویب ڈیسک): اقوام متحدہ کی سلامتی کونسل میں ایران کے خلیجی ممالک پر حملوں کے خلاف مذمتی قرارداد بھاری اکثریت سے منظور کر لی گئی۔
تفصیلات کے مطابق ایران کے خلاف یہ قرارداد بحرین نے خلیجی تعاون کونسل (GCC) کے رکن ممالک اور اردن پر ہونے والے میزائل اور ڈرون حملوں کے تناظر میں پیش کی تھی۔
سلامتی کونسل کے 15 میں سے 13 ارکان نے قرارداد کے حق میں ووٹ دیا، جبکہ پاکستان نے بھی قرارداد کی حمایت کرتے ہوئے ایرانی حملوں کی مذمت کی۔ روس اور چین نے ووٹنگ کے عمل میں حصہ نہیں لیا۔
قرارداد میں ایران سے مطالبہ کیا گیا ہے کہ وہ خلیجی ممالک پر حملے فوری طور پر بند کرے، خطے میں کشیدگی کم کرے اور بین الاقوامی قوانین کی پاسداری یقینی بنائے۔
بحرین کی جانب سے پیش کردہ اس قرارداد کو مجموعی طور پر 135 ممالک کی اخلاقی حمایت حاصل تھی۔ قرارداد میں واضح کیا گیا کہ خطے کے اقتصادی مراکز اور خودمختاری پر حملے ناقابلِ قبول ہیں۔
