منامہ/واشنگٹن (ویب ڈیسک): بحرین نے ایران کے لیے مبینہ جاسوسی کے الزام میں 4 شہریوں کی گرفتاری کا اعلان کر دیا ہے۔
غیر ملکی میڈیا رپورٹس کے مطابق بحرینی وزارت داخلہ کا کہنا ہے کہ گرفتار افراد کی عمریں 22 سے 36 سال کے درمیان ہیں اور وہ اہم مقامات کی تصاویر لے کر پاسدارانِ انقلاب کو بھیجتے تھے۔
دوسری جانب امریکا نے ایرانی بندرگاہوں کو نشانہ بنانے کی دھمکی دی ہے، جس پر ایران نے سخت جوابی کارروائی سے خبردار کیا ہے۔
امریکی فوج کی سینٹرل کمانڈ (سینٹ کام) نے ایرانی شہریوں کو بندرگاہوں سے دور رہنے کی ہدایت جاری کرتے ہوئے کہا ہے کہ آبنائے ہرمز کے ساتھ موجود تمام پورٹ تنصیبات فوری طور پر خالی کر دی جائیں۔
بیان میں کہا گیا ہے کہ ڈاک ورکرز، انتظامی اور کمرشل عملہ ایرانی بحری جہازوں اور فوجی سامان سے دور رہے، اور فوجی مقاصد کے لیے استعمال ہونے والی سویلین بندرگاہیں اب جائز فوجی ہدف سمجھی جا سکتی ہیں۔
خطے میں جاری کشیدگی کے باعث صورتحال مزید حساس ہو گئی ہے اور عالمی سطح پر تشویش میں اضافہ دیکھا جا رہا ہے۔
