سکھر میٹرک امتحانات میں نقل کا انکشاف، 23 طلبہ کے خلاف کارروائی؛ پنجاب میں تعلیمی ہفتے سے متعلق افواہیں مسترد

سکھر: سکھر تعلیمی بورڈ کے زیر اہتمام میٹرک امتحانات کے دوران ایک سرکاری امتحانی مرکز میں نقل اور بدعنوانی کے متعدد واقعات سامنے آئے ہیں، جہاں ایک لڑکی امیدوار اپنی سہیلی کی جگہ انگریزی کا پرچہ دیتے ہوئے پکڑی گئی۔حکام کے مطابق واقعہ ایک گورنمنٹ گرلز ہائی اسکول میں پیش آیا، جہاں جعلی امیدوار کی نشاندہی کے بعد اسے فوری طور پر امتحانی ہال سے باہر نکال دیا گیا۔ اسسٹنٹ کنٹرولر امتحانات نے تصدیق کی کہ ملوث امیدوار کے خلاف قانونی کارروائی کی جائے گی۔

امتحانی مرکز میں سخت نگرانی کے دوران مزید 23 طلبہ کو نقل کرتے ہوئے پکڑا گیا، جن کے خلاف بھی مقدمات درج کر لیے گئے ہیں۔ حکام کا کہنا ہے کہ امتحانات میں شفافیت یقینی بنانے کے لیے کریک ڈاؤن مزید سخت کیا جا رہا ہے اور ضابطہ اخلاق کی خلاف ورزی برداشت نہیں کی جائے گی۔دوسری جانب پنجاب میں تعلیمی اداروں کے ہفتے میں چار دن کھلنے سے متعلق افواہوں کو مسترد کر دیا گیا ہے۔ صوبائی وزیر تعلیم رانا سکندر حیات نے واضح کیا ہے کہ یکم اپریل سے صوبے بھر میں تمام سرکاری و نجی تعلیمی ادارے معمول کے مطابق ہفتے میں پانچ دن کھلے رہیں گے۔لاہور سے جاری بیان میں انہوں نے کہا کہ اس ول، کالج اور یونیورسٹیاں روایتی فزیکل کلاسز کے ساتھ اپنی سرگرمیاں جاری رکھیں گی، جبکہ ہائبرڈ یا آن لائن نظام سے متعلق گردش کرنے والی خبریں بے بنیاد ہیں۔ انہوں نے طلبہ کو ہدایت کی کہ وہ باقاعدگی سے تعلیمی اداروں میں حاضری یقینی بنائیں۔