اسلام آباد:فوری پیغام رسانی کی مقبول ایپ واٹس ایپ نے صارفین کی پرائیویسی مزید بہتر بنانے کے لیے یوزر نیم (Username) فیچر متعارف کرانے کا اعلان کیا ہے، جس کے بعد صارفین فون نمبر شیئر کیے بغیر ایک دوسرے سے رابطہ کر سکیں گے۔
کمپنی کے مطابق صارفین جلد ہی اپنا منفرد یوزر نیم منتخب کر سکیں گے، جس کے ذریعے دوست، اہل خانہ اور دیگر افراد موبائل نمبر کے بجائے یوزر نیم استعمال کرتے ہوئے رابطہ قائم کر سکیں گے۔
میٹا کا کہنا ہے کہ نئے فیچر کا مقصد ایسے مواقع پر صارفین کے فون نمبرز کو محفوظ رکھنا ہے، جب وہ کسی واٹس ایپ گروپ میں شامل ہوں یا پہلی بار کسی شخص یا ادارے کو پیغام بھیجیں۔
کمپنی کے مطابق ایک بار یوزر نیم بنانے کے بعد دیگر صارفین کو رابطہ کرنے کے لیے صرف وہی یوزر نیم درکار ہوگا، جبکہ فون نمبر ظاہر نہیں ہوگا۔
میٹا نے واضح کیا کہ چونکہ دنیا بھر میں واٹس ایپ کے تقریباً تین ارب صارفین موجود ہیں، اس لیے ہر یوزر نیم منفرد ہوگا اور تمام صارفین اپنی پسند کا نام حاصل نہیں کر سکیں گے۔
کمپنی نے یہ بھی بتایا کہ معروف شخصیات، سرکاری عہدیداروں اور دیگر نمایاں شخصیات سے منسوب یوزر نیم محدود کیے جائیں گے تاکہ جعل سازی، نقالی اور دھوکہ دہی کے امکانات کو کم کیا جا سکے۔
واٹس ایپ کے مطابق یوزر نیم فیچر صارفین کی پرائیویسی اور سیکیورٹی کو مزید مضبوط بنانے کی حکمت عملی کا حصہ ہے، جس کے ذریعے ذاتی فون نمبر ظاہر کیے بغیر محفوظ اور آسان رابطے کو فروغ دیا جائے گا۔
