نیوز ڈیسک
اسلام آباد: ملک کے مختلف علاقوں میں موسم کی صورتحال مختلف ہے، جہاں خیبرپختونخوا میں بارشوں نے گرمی کا زور توڑ دیا ہے، وہیں کراچی میں گرج چمک کے ساتھ بارش کا امکان ظاہر کیا گیا ہے جبکہ بلوچستان کے بیشتر علاقوں میں موسم گرم اور خشک رہنے کی پیش گوئی کی گئی ہے۔
پاکستان محکمہ موسمیات (پی ایم ڈی) کے مطابق کراچی میں اتوار کو موسم جزوی طور پر ابر آلود رہنے کا امکان ہے، جبکہ شہر کے مختلف علاقوں میں ہلکی بارش اور گرج چمک کے ساتھ بارش ہو سکتی ہے۔
محکمہ موسمیات کے مطابق کراچی میں کم سے کم درجہ حرارت 28.8 ڈگری سینٹی گریڈ ریکارڈ کیا گیا، جبکہ موجودہ درجہ حرارت 30 ڈگری سینٹی گریڈ ہے۔ شہر میں نمی کا تناسب 78 فیصد ریکارڈ کیا گیا جبکہ جنوب مغربی ہوائیں 11 کلومیٹر فی گھنٹہ کی رفتار سے چل رہی ہیں۔ کراچی کا زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہنے کا امکان ہے۔
دوسری جانب خیبرپختونخوا کے مختلف علاقوں، خصوصاً پشاور اور بالائی اضلاع میں ہونے والی بارشوں سے موسم خوشگوار ہو گیا ہے اور شہریوں کو گرمی سے ریلیف ملا ہے۔
پی ایم ڈی نے پشاور، مردان، کوہاٹ، بنوں، ہزارہ، ڈیرہ اسماعیل خان اور مالاکنڈ ڈویژن میں مزید بارشوں کی پیش گوئی کی ہے۔
پشاور میں درجہ حرارت 29 ڈگری سینٹی گریڈ ریکارڈ کیا گیا جبکہ نمی کا تناسب 72 فیصد رہا۔ صوبے کے دیگر علاقوں میں چترال کا درجہ حرارت 21، دیر 20، مالم جبہ 22، سیدو شریف 25، بنوں 32، ڈیرہ اسماعیل خان 33 اور ایبٹ آباد 25 ڈگری سینٹی گریڈ ریکارڈ کیا گیا۔
صوبائی ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا میں بارشوں کے الرٹ میں 5 اگست تک توسیع کر دی ہے۔ متعلقہ اداروں کو الرٹ رہنے کی ہدایت کی گئی ہے جبکہ شہریوں کو احتیاطی تدابیر اختیار کرنے کا مشورہ دیا گیا ہے۔
ادھر بلوچستان کے بیشتر علاقوں میں موسم گرم اور خشک رہنے کا امکان ہے، تاہم ژوب، موسیٰ خیل، بارکھان، کوہلو، ڈیرہ بگٹی، نصیر آباد، جھل مگسی، سبی، لورالائی، آواران، لسبیلہ اور خضدار سمیت بعض علاقوں میں بارش ہو سکتی ہے۔
بلوچستان میں نوکنڈی سب سے گرم مقام رہا جہاں درجہ حرارت 44 ڈگری سینٹی گریڈ تک پہنچ گیا۔ سبی میں 43، تربت میں 41، چمن میں 39، کوئٹہ میں 38، قلات اور ژوب میں 33، گوادر اور جیوانی میں 32 جبکہ زیارت میں 26 ڈگری سینٹی گریڈ درجہ حرارت ریکارڈ کیا گیا۔
