اسلام اباد: سابق امریکی صدر ڈونلڈ ٹرمپ پر فائرنگ کرنے والے شخص کی شناخت ہوگئیامریکا کے وفاقی تحقیقاتی ادارے ایف بی آئی کے مطابق ٹرمپ پر فائرنگ کرنے والا ایک مقامی شخص تھا جس کی عمر 20 سال تھی اور نام تھامس میتھیو کروکس تھا۔
امریکی میڈیا کے مطابق ڈونلڈ ٹرمپ حملے کے وقت مشتبہ حملہ آور سے تقریباً 120 سے 150 میٹر دور تھے، حملہ آور ریلی کے مقام سے بالکل باہرعمارت کی چھت پر تھا۔
ایک امریکی اخبار کے مطابق ڈونلڈ ٹرمپ کی ریلی میں فائرنگ کرنے والا مشتبہ شخص رجسٹرڈ ریپبلکن تھا۔
امریکی سیکرٹ سروس نے بتایا ہے کہ حملہ آور نے ریلی کے باہر سے ایک بلند مقام سے متعدد گولیاں چلائیںامریکا کے سابق صدرپر قاتلانہ حملے کے فوراً بعد اہلکاروں نے حملہ آور کو گولی مار دی تھی۔
ٹرمپ کو اہلکاروں نے ڈرامائی انداز سے ایک ہی لمحے میں حصار میں لے لیا تھا، جبکہ خاتون اہلکار بھی ڈونلڈ ٹرمپ کے سامنے ڈھال بن گئیں اور سابق صدر کے پورے جسم کو محفوظ بنا لیا۔
اس موقع پر اہلکاروں کو یہ کہتے بھی سنا جا سکتا ہے کہ شوٹر مر چکا ہے، اب ٹرمپ کو اسٹیج سے گاڑی کی طرف لے جایا جا سکتا ہے جس پر سابق صدر کی سیکیورٹی پر مامور اہلکاروں نے انہیں کھڑا کیا اور انہیں پورے حصار میں لے کر گاڑی کی طرف روانہ ہو گئے۔
غیرملکی میڈیا کے مطابق فائرنگ کے واقعے کے بعد ٹرمپ نیو جرسی پہنچ گئے ہیں۔
واضح رہے کہ امریکا کے ری پبلکن صدارتی امیدوارٹرمپ انتخابی ریلی کے دوران فائرنگ سے زخمی ہوگئے تھے۔
ٹرمپ پنسلوینیا کے علاقے بٹلر میں منعقدہ ریلی کے شرکا سے خطاب کے لیے اسٹیج پر موجود تھے جب ان پر فائرنگ ہوئی، گولی بظاہر ٹرمپ کے کان کو چھوتی ہوئی نکل گئی۔
ریلی کے دوران فائرنگ کرنے والا حملہ آور مارا گیا جبکہ ایک دوسرا شخص بھی ہلاک ہوا ہے۔
