اسلام آباد:ملک کے مختلف شہروں سے جشن عید میلاد النبی ﷺ کے مرکزی جلوس نکل چکے ہیں۔کراچی میں آج تین مرکزی جلوس نکالے جا رہے ہیں جو نمائش پہنچیں گے۔
سنی تحریک کی ریلی کی قیادت شاداب رضا نقشبندی کر رہے ہیں، جو لیاقت آباد ڈاک خانے سے شروع ہو کر کھارادر میں چھٹن شاہ کے مزار پر اختتام پذیر ہوگی۔
راولپنڈی: مرکزی جلوس کے روٹ کی طرف آنے والے راستے سیل
راولپنڈی میں مرکزی جلوس کے روٹ کی طرف جانے والے راستے سیل کر دیے گئے ہیں۔ ضلعی انتظامیہ، پولیس، اور سول ڈیفنس کے اہلکار بڑی تعداد میں تعینات ہیں۔
ملتان: 12 ربیع الاول کا مرکزی جلوس برآمد
ملتان میں 12 ربیع الاول کا مرکزی جلوس قلعہ کہنہ قاسم سے برآمد ہو چکا ہے۔ پولیس کے مطابق، سیکیورٹی کے لیے دو ہزار سے زائد اہلکار تعینات ہیں۔
جبکہ فیصل آباد میں 12 ربیع الاول کے سلسلے میں 143 جلوس اور 20 محافل منعقد کی جائیں گی۔
پولیس کا کہنا ہے کہ سیکیورٹی کے لیے 4 ہزار 561 اہلکار ڈیوٹی پر ہوں گے، اور مرکزی جلوسوں کی نگرانی سی سی ٹی وی اور ڈرون کیمروں سے کی جائے گی۔
حیدرآباد: 12 ربیع الاول کا جلوس ظہر کی نماز کے بعد برآمد ہو گا
حیدرآباد میں 12 ربیع الاول کا جلوس بعد نمازِ ظہر برآمد ہو گا اور کوہ نور چوک پر اختتام پذیر ہوگا۔
ایس ایس پی کے مطابق، جلوسوں اور ریلیوں کی سیکیورٹی کے لیے 4 ہزار سے زائد پولیس اہلکار تعینات ہیں۔
سکھر میں 12 ربیع الاول کا مرکزی جلوس مفتی محمد ابراہیم قادری کی قیادت میں برآمد ہوا۔
پاکپتن میں 12ربیع الاول کا جلوس غلہ منڈی سے برآمد
پاکپتن میں 12 ربیع الاول کا جلوس غلہ منڈی سے برآمد ہوا، جس کی قیادت مرکزی میلاد کمیٹی کے عہدیدار، سیاسی، اور مذہبی رہنما کر رہے ہیں۔
اوکاڑہ: 12ربیع الاول کی مناسبت سے 69 جلوس بر آمد
اوکاڑہ میں 12 ربیع الاول کی مناسبت سے 69 جلوس برآمد ہو چکے ہیں، جن میں بڑی تعداد میں لوگ شریک ہیں۔
مختلف شہروں میں موبائل فون سروس معطل
12ربیع الاول کے اجتماعات کی سیکیورٹی کے لیے کوئٹہ شہر میں موبائل فون سروس معطل کر دی گئی ہے۔
اسی طرح، راولپنڈی میں بھی مرکزی جلوس اور ملحقہ علاقوں میں موبائل فون سروس بند کر دی گئی ہے۔
