ایبٹ آباد: مانگل کے علاقے میں 20 جولائی بروز اتوار کو “مانگل بچاؤ تحریک” کے تحت ایک اہم آگاہی نشست نکا پانی کے مقام پر منعقد ہوئی، جس میں مقامی افراد نے بھرپور جوش و جذبے سے شرکت کی۔
اس موقع پر علاقے کی فطری خوبصورتی، ماحولیاتی توازن اور قدرتی وسائل کے تحفظ کے لیے مشترکہ عزم کا اظہار کیا گیا۔
نشست کے دوران فیصلہ کیا گیا کہ مانگل دریا میں شامل ہونے والے آلودہ پانی، جو ایوب ٹیچنگ ہسپتال، اسمال انڈسٹری اور قریبی رہائشی کالونیوں سے خارج ہو رہا ہے، کی روک تھام کے لیے ہنگامی اور مؤثر اقدامات کیے جائیں گے تاکہ دریا کا قدرتی حسن اور ماحولیاتی توازن برقرار رکھا جا سکے۔
اس کے علاوہ پہاڑوں پر لگنے والی آگ کی روک تھام کے لیے مساجد، اسکولوں اور دیگر مقامات پر عوامی آگاہی مہمات چلانے کا بھی فیصلہ کیا گیا۔
ماحولیاتی بہتری کے لیے شجرکاری مہم شروع کرنے اور درختوں کی حفاظت کو یقینی بنانے پر بھی زور دیا گیا۔ شرکاء نے غیر قانونی شکار کی روک تھام اور جنگلی و آبی حیات کے تحفظ کے لیے باہمی تعاون سے کام کرنے کے عزم کا اظہار کیا۔
نشست کے دوران اس امر پر زور دیا کہ آنے والی نسلوں کو صحت مند اور محفوظ ماحول فراہم کرنے کے لیے معاشرتی سطح پر شعور اجاگر کرنا اور عملی اقدامات کرنا وقت کی اہم ضرورت ہے۔ نشست کے اختتام پر شرکاء نے اس عزم کا اعادہ کیا کہ وہ ماحولیاتی تحفظ کے لیے ہر سطح پر آواز بلند کرتے رہیں گے۔
