نیوزڈیسک
اسلام آباد: وزیراعظم شہباز شریف چینی صدر شی جن پنگ کی دعوت پر آج چین کے دورے پر روانہ ہوگئے، جہاں وہ چار ستمبر تک قیام کریں گے۔
اپنے دورے کے دوران وزیراعظم شنگھائی تعاون تنظیم (SCO) کے سربراہ اجلاس میں شرکت کریں گے اور صدر شی جن پنگ سمیت وزیراعظم لی کیانگ سے اہم ملاقاتیں کریں گے۔
ان ملاقاتوں میں پاک-چین دوطرفہ تعاون، سی پیک فیز ٹو پر پیشرفت اور علاقائی و عالمی امور زیرِ غور آئیں گے۔
شہباز شریف اپنے خطاب میں خطے میں موسمیاتی تبدیلی کے اثرات اور بڑھتی ہوئی قدرتی آفات کے نئے چیلنجز کو اجاگر کریں گے۔
وہ بیجنگ میں عالمی اینٹی فاشسٹ جنگ کی 80 ویں سالگرہ کے موقع پر ہونے والی فوجی پریڈ میں بھی شریک ہوں گے، جہاں عالمی رہنما بھی موجود ہوں گے۔
دورے کے دوران وزیراعظم ممتاز چینی تاجروں اور کارپوریٹ ایگزیکٹوز سے ملاقات کریں گے تاکہ تجارت، معیشت اور سرمایہ کاری کے نئے مواقع تلاش کیے جا سکیں۔ اس کے علاوہ وہ پاک-چین بزنس ٹو بزنس کانفرنس سے خطاب بھی کریں گے۔
وزیراعظم کے ہمراہ نائب وزیراعظم اسحاق ڈار، وزیر اطلاعات عطاء اللہ تارڑ اور مشیر طارق فاطمی بھی ہیں۔
یہ دورہ قیادت سطح پر تبادلوں کا حصہ ہے جس کا مقصد پاک-چین تعلقات کو مزید گہرا اور مضبوط بنانا ہے۔
دونوں ممالک ایک دوسرے کے بنیادی مفادات پر ہمیشہ کی طرح حمایت جاری رکھنے کے عزم کا اعادہ کریں گے
