برطانیہ میں ایک سرجن نے جدید روبوٹک ٹیکنالوجی کی مدد سے تقریباً ڈھائی ہزار کلومیٹر دور موجود مریض کا کامیاب آپریشن کر کے طبی تاریخ میں ایک اہم سنگِ میل قائم کر دیا۔برطانوی نشریاتی ادارے بی بی سی کی رپورٹ کے مطابق لندن کے ایک سرجن نے پہلی مرتبہ ایسا روبوٹک آپریشن کیا جس میں مریض ان سے تقریباً 1,500 میل (2,400 کلومیٹر) دور جبرالٹر میں موجود تھا۔معروف روبوٹک یورولوجیکل سرجن پروفیسر پروکر داس گپتا نے بتایا کہ جب وہ 62 سالہ کینسر کے مریض پال بکسن کی پروسٹیٹ نکالنے کی سرجری کر رہے تھے تو انہیں ایسا محسوس ہو رہا تھا جیسے وہ خود مریض کے پاس موجود ہوں۔
پال بکسن نے کہا کہ اس تجربے کا حصہ بننا اور طبی تاریخ میں اپنا کردار ادا کرنا ان کے لیے ایک آسان فیصلہ تھا۔ماہرین کے مطابق مستقبل میں دور سے کی جانے والی روبوٹک سرجری سے مریضوں کو علاج کے لیے طویل سفر اور اخراجات سے بچایا جا سکے گا، جبکہ دور دراز علاقوں میں رہنے والے افراد کو بھی بہتر طبی سہولیات میسر آئیں گی۔
