پاکستان کی معاشی پالیسیوں اور خصوصی سرمایہ کاری سہولت کونسل (SIFC) کی مؤثر حکمتِ عملی کے باعث عالمی سرمایہ کاروں کا اعتماد بحال ہونا شروع ہو گیا ہے۔ اسی سلسلے میں ایک بڑے چینی ایرو اسپیس گروپ نے پاکستان میں 5 سے 10 ارب ڈالر تک کی بڑی سرمایہ کاری میں گہری دلچسپی ظاہر کی ہے۔تفصیلات کے مطابق چینی سرمایہ کاروں کے ایک اعلیٰ سطحی وفد نے وفاقی وزیر صنعت و پیداوار قیصر احمد شیخ سے ملاقات کی، جس میں پاکستان کے معاشی حالات، سرمایہ کاری کے مواقع اور صنعتی تعاون پر تفصیلی تبادلہ خیال کیا گیا۔ملاقات کے دوران ٹیکنالوجی کی منتقلی، صنعتی ترقی اور پاکستان کے قدرتی وسائل کے مؤثر استعمال کے حوالے سے بھی بات چیت ہوئی۔ چینی گروپ نے خاص طور پر مینوفیکچرنگ سیکٹر میں بڑے پیمانے پر سرمایہ کاری میں دلچسپی ظاہر کی۔وفاقی وزیر قیصر احمد شیخ نے وفد کو بریفنگ دیتے ہوئے بتایا کہ حکومت خصوصی اقتصادی زونز (SEZs) میں سرمایہ کاری کرنے والوں کو خصوصی ٹیکس چھوٹ فراہم کر رہی ہے۔ انہوں نے کہا کہ سرمایہ کاری کے عمل کو آسان اور تیز بنانے کے لیے قانونی اور انتظامی رکاوٹیں بھی دور کی جا رہی ہیں۔انہوں نے مزید کہا کہ ایس آئی ایف سی کے ون ونڈو آپریشن کے ذریعے غیر ملکی سرمایہ کاروں کو ہر ممکن سہولت فراہم کی جا رہی ہے، جس سے صنعتی ترقی کی رفتار میں اضافہ ہو رہا ہے۔معاشی ماہرین کے مطابق اگر چینی گروپ کی یہ سرمایہ کاری عملی شکل اختیار کر لیتی ہے تو اس سے پاکستان کے زرمبادلہ کے ذخائر میں بہتری آئے گی، جدید ٹیکنالوجی ملک میں آئے گی اور ہزاروں نئے روزگار کے مواقع بھی پیدا ہوں گے۔
