وزیراعظم شہباز شریف کی زیر صدارت کفایت شعاری کے حوالے سے ایک اہم اجلاس منعقد ہوا جس میں وفاقی وزرا، چاروں صوبوں کے نمائندوں اور اعلیٰ سرکاری حکام نے شرکت کی۔رائع کے مطابق اجلاس میں وزیراعظم نے معاشی حالات بہتر ہونے تک تنخواہوں اور مراعات میں کمی کا عندیہ دیا۔ انہوں نے کہا کہ وفاقی کابینہ کے ارکان بھی کفایت شعاری پلان میں اپنا حصہ ڈالیں گے۔اجلاس میں سادگی اور کفایت شعاری پر مبنی مختلف تجاویز اور سفارشات پیش کی گئیں جن کی بنیاد پر حتمی لائحہ عمل تیار کیا جائے گا۔ اس موقع پر ممکنہ جنگی صورت حال کے معیشت پر اثرات اور ملکی معیشت کو مستحکم رکھنے کے اقدامات کا بھی جائزہ لیا گیا۔وزیراعظم کو بریفنگ دی گئی کہ علاقائی اور عالمی حالات پاکستان کی معیشت پر اثر انداز ہو سکتے ہیں، خصوصاً توانائی کی فراہمی اور عالمی منڈیوں میں قیمتوں کے اتار چڑھاؤ سے چیلنجز پیدا ہو سکتے ہیں۔وزیراعظم شہباز شریف نے کہا کہ موجودہ حالات میں معاشی استحکام کے لیے بروقت اقدامات ضروری ہیں۔ انہوں نے کہا کہ حکومت صورتحال پر گہری نظر رکھے ہوئے ہے اور قومی معیشت کا استحکام اولین ترجیح ہے۔انہوں نے مزید کہا کہ مشکل حالات میں عوام کو زیادہ سے زیادہ ریلیف فراہم کیا جائے گا جبکہ تمام سرکاری ملازمین اور وزرا کو سادگی اور کفایت شعاری اختیار کرنے کی ہدایت بھی کی گئی تاکہ ملکی پیداوار، برآمدات اور غذائی تحفظ متاثر نہ ہوں۔
