نیوز ڈیسک
اسلام آباد: پاکستان میں ایچ آئی وی سے متاثرہ بچوں کی بڑھتی ہوئی تعداد نے صحت کے حکام کی تشویش میں اضافہ کر دیا ہے، جبکہ ان بچوں کی غذائی ضروریات پوری کرنے اور علاج کے نتائج بہتر بنانے کے لیے خصوصی اقدامات کی منصوبہ بندی کی جا رہی ہے۔
وفاقی وزارت صحت کے اعداد و شمار کے مطابق، ملک میں اس وقت تقریباً 7,500 بچے ایچ آئی وی کے ساتھ زندگی گزار رہے ہیں، جو علاج حاصل کرنے والے مجموعی 62,000 مریضوں کا تقریباً 12 فیصد بنتے ہیں۔
اعداد و شمار کے مطابق سندھ سب سے زیادہ متاثرہ صوبہ ہے، جہاں تقریباً 4,200 ایچ آئی وی متاثرہ بچے رجسٹرڈ ہیں، جو ملک میں بچوں کے ایچ آئی وی کیسز کی سب سے بڑی تعداد ہے۔
حکومت نے متاثرہ بچوں کی غذائی ضروریات پوری کرنے کے لیے بین الاقوامی اداروں سے تعاون طلب کیا ہے۔ اس سلسلے میں یونیسیف، ورلڈ فوڈ پروگرام (WFP)، ورلڈ ہیلتھ آرگنائزیشن (WHO) اور نیوٹریشن انٹرنیشنل سمیت دیگر اداروں سے رابطہ کیا گیا ہے۔
مجوزہ منصوبے کے تحت شدید غذائی قلت کا شکار ایچ آئی وی متاثرہ بچوں کو طبی نگرانی کے ساتھ خصوصی غذائی سپلیمنٹس فراہم کیے جائیں گے، جبکہ والدین اور دیکھ بھال کرنے والوں کو بچوں کی بہتر غذائی دیکھ بھال کے حوالے سے تربیت بھی دی جائے گی۔
ماہرین صحت کے مطابق ایچ آئی وی کے ساتھ زندگی گزارنے والے بچوں کو وائرس کے جسم پر اثرات کے باعث دیگر بچوں کے مقابلے میں 10 سے 20 فیصد زیادہ توانائی اور پروٹین کی ضرورت ہوتی ہے۔ ان کا کہنا ہے کہ بہتر غذائیت نہ صرف علاج کے اثرات بڑھا سکتی ہے بلکہ بچوں کی مجموعی صحت کو بھی بہتر بنا سکتی ہے۔
یہ اقدامات ایسے وقت میں سامنے آئے ہیں جب حکومت ملک بھر میں ایچ آئی وی کی روک تھام، تشخیص اور علاج کے پروگرامز کو مزید مؤثر بنانے کے لیے کوششیں جاری رکھے ہوئے ہے۔
