نیوز ڈیسک
نیشین: پاکستان نے سنسنی خیز مقابلے کے بعد تھائی لینڈ کو 3 وکٹوں سے شکست دے کر ایشین گیمز کی خواتین کرکٹ کے سیمی فائنل میں جگہ بنا لی۔
کوروگی اسپورٹس پارک میں کھیلے گئے کوارٹر فائنل میں پاکستان کو 11 اوورز میں 92 رنز کا نظرثانی شدہ ہدف ملا، جس کے تعاقب میں قومی ٹیم نے ابتدا میں جارحانہ انداز اپنایا تاہم بعد میں تھائی لینڈ کے بولرز نے پاکستانی بیٹنگ پر دباؤ بڑھا دیا۔
پاکستان نے پہلے تین اوورز میں 33 رنز بنائے، جبکہ شوال ذوالفقار نے ٹیم کو تیز آغاز فراہم کیا۔ تاہم چوتھے اوور میں ان کی وکٹ گرنے کے بعد پاکستان کی رفتار کم ہوگئی۔
تھائی لینڈ کی آف اسپنر اونیکا کامچومپھو نے عمدہ بولنگ کرتے ہوئے تین وکٹیں حاصل کیں اور پاکستانی مڈل آرڈر کو مشکلات سے دوچار کر دیا۔ ایک موقع پر پاکستان کو فتح کے لیے 11 رنز فی اوور درکار تھے۔
ایسے میں کپتان فاطمہ ثنا نے ذمہ داری سنبھالی اور کامچومپھو کے ایک اوور میں تین چوکے اور ایک چھکا لگا کر میچ کا رخ تبدیل کر دیا۔ ایمن فاطمہ نے بھی اسی اوور میں چھکا لگایا، جس سے پاکستان نے مجموعی طور پر 25 رنز حاصل کیے۔
فاطمہ ثنا 21 رنز بنا کر آؤٹ ہوئیں، جبکہ ایمن فاطمہ بھی آخری سے قبل اوور میں پویلین لوٹ گئیں۔ تاہم طوبیٰ حسن نے دباؤ میں شاندار بیٹنگ کا مظاہرہ کرتے ہوئے ایک چھکا اور ایک چوکا لگایا اور پاکستان کو فتح کے قریب پہنچا دیا۔
پاکستان کو آخری اوور میں صرف 4 رنز درکار تھے اور قومی ٹیم نے 10.4 اوورز میں ہدف حاصل کر لیا۔ پاکستان نے 3 وکٹوں سے کامیابی حاصل کرتے ہوئے سیمی فائنل میں جگہ بنا لی۔
اس سے قبل بارش اور گیلی آؤٹ فیلڈ کے باعث میچ کو 11 اوورز تک محدود کر دیا گیا تھا۔ پاکستان نے ٹاس جیت کر پہلے فیلڈنگ کا فیصلہ کیا۔
تھائی لینڈ نے مقررہ 11 اوورز میں 4 وکٹوں کے نقصان پر 91 رنز بنائے۔ ناناپت کونچاروینکائی نے 49 رنز کی اہم اننگز کھیلتے ہوئے چار چوکے لگائے اور اپنی ٹیم کو قابلِ دفاع مجموعہ فراہم کیا۔
فاطمہ ثنا نے بیٹنگ کے ساتھ بولنگ میں بھی نمایاں کارکردگی دکھائی اور 22 رنز دے کر 2 وکٹیں حاصل کیں۔ انہوں نے آخری اوور میں کونچاروینکائی کو ایل بی ڈبلیو آؤٹ کیا۔
تھائی لینڈ کی کپتان نارومول چائی وائی نے بھی مختصر مگر جارحانہ اننگز کھیلی اور اپنی پہلی دو گیندوں پر ایک چھکا اور ایک چوکا لگایا، تاہم وہ جلد آؤٹ ہوگئیں۔
تھائی لینڈ کی جانب سے اونیکا کامچومپھو نے 37 رنز دے کر 3 وکٹیں حاصل کیں، لیکن ان کی عمدہ بولنگ بھی پاکستان کو فتح سے نہ روک سکی۔
بنگلہ دیش بھی سیمی فائنل میں
دوسرے کوارٹر فائنل میں بنگلہ دیش نے ہانگ کانگ کے خلاف میچ بارش اور گیلی آؤٹ فیلڈ کے باعث بے نتیجہ ختم ہونے کے بعد سیمی فائنل میں جگہ بنا لی۔
مسلسل بارش کے باعث دونوں ٹیموں کے درمیان کھیل ممکن نہ ہوسکا، جس کے بعد بنگلہ دیش نے اپنی بہتر سیڈنگ کی بنیاد پر اگلے مرحلے میں رسائی حاصل کی۔a
