اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے گلگت بلتستان، بالائی خیبر پختونخوا اور آزاد کشمیر میں ممکنہ شدید سردی کی لہر کے پیش نظر الرٹ جاری کر دیا ہے۔
این ڈی ایم اے کے مطابق آئندہ چند دنوں میں، جنوری کے اختتام تک، بالائی علاقوں میں رات اور صبح کے اوقات میں شدید سرد موسم متوقع ہے، جبکہ پہاڑی علاقوں میں درمیانے سے شدید درجے کی برفباری کا امکان ہے۔ برفباری کے باعث رابطہ سڑکیں بند ہونے، ٹرانسپورٹ میں خلل اور بجلی کی فراہمی متاثر ہونے کا خدشہ ہے۔
حکام نے خبردار کیا ہے کہ پہاڑی علاقوں میں برفباری کے نتیجے میں برفانی تودے گرنے اور پھسلن کے خطرات میں اضافہ ہو سکتا ہے۔ عوام سے احتیاطی تدابیر اختیار کرنے اور غیر ضروری سفر سے گریز کی اپیل کی گئی ہے، جبکہ برفباری والے علاقوں میں گاڑیوں کے ٹائروں پر حفاظتی زنجیروں کے استعمال کی ہدایت بھی جاری کی گئی ہے۔
این ڈی ایم اے کے مطابق شدید سردی اور برفباری بچوں، بزرگوں اور بیمار افراد کی صحت پر منفی اثر ڈال سکتی ہے، اس لیے انہیں گرم کپڑے پہننے اور ہیٹر کے محفوظ استعمال کا مشورہ دیا گیا ہے۔
ادھر میدانی علاقوں میں سرد اور خشک موسم رہنے کے ساتھ بعض مقامات پر کورا یا پالا پڑنے کا امکان ہے، جس سے فصلوں اور باغات کو نقصان پہنچ سکتا ہے۔
این ڈی ایم اے نے صوبائی اداروں اور ضلعی انتظامیہ کو ہدایت کی ہے کہ وہ ممکنہ برفباری کے پیش نظر پیشگی اقدامات کریں اور ضروری مشینری کی دستیابی یقینی بنائیں۔ سیاحتی مقامات پر آمد و رفت کے لیے بھی دستیاب وسائل، بالخصوص رہائشی سہولیات، کو مدنظر رکھتے ہوئے انتظامات کرنے کی ہدایت کی گئی ہے۔
اتھارٹی نے شہریوں کو موسم سے متعلق مستند معلومات کے لیے ٹی وی، ریڈیو، تصدیق شدہ سوشل میڈیا اکاؤنٹس اور پاک این ڈی ایم اے ڈیزاسٹر الرٹ موبائل ایپ سے رہنمائی لینے کا مشورہ دیا ہے۔
این ڈی ایم اے کا کہنا ہے کہ وہ ممکنہ موسمی خطرات کے حوالے سے متعلقہ اداروں کو مسلسل پیشگی آگاہی اور ضروری اقدامات کے لیے ہدایات جاری کر رہا ہے۔
